Feeds:
Posts
Comments

Archive for May, 2010


بحب اتفرج علي برنامج التفاح الاخضر. بيجيبه فيه خبير للتنميه البشرية اسمه محمد فاروق ليه موقع ع الانترنت حلو اوي.

http://www.2knowmyself.com/

قريت فيه عن سيكولوجيه الحب. عمري ما اقتنعت بالحب من اول نظرة . يعني ايه  اول ما اشوف حد اقع في حبه كده عدل . طيب يعني ازاي ما هو ربنا عرفوه بالعقل . هو انا شوفت فيه ايه غير هيئته. طبعا انا لا انكر ان فيه حاجات ممكن تحصل في التواصل بين الناس (زي الميل القلبي مثلا) يتعايشون معاها ويشعروا بيها من غير فهمها او ادراك مهيتها ومن غير القدرة ع التحكم فيها . زي الكيمياء اللي بتحصل بين المواد او قوي التجاذب والتنافر بين الاشياء وبعضها . يمكن يكون سبب عدم ادراكنا ليها  هو ارتباطنا الزائد  بالمادية!!! او حتي اننا بطلنا نصاحب مشاعرنا ونفهمها صح او حتي نفهم نفسنا – بنسيب ماديه حايتنا تلهينا وتتوهنا. انا مؤمنه انه علشان الانسان يعرف يحب صح لازم يحب بكل كيانه مش بنظره وبس او حتي ودنه بس او … ببساطه الانسان عباره عن كيان متعدد الابعاد ؟!! يعني انا عندي قلب ومشاعر ربطاني بالروح  وعندي عقل-داخل فيه المنطق كعامل مسيطر اساسي- ربطني بلحم ودم ( الجزء المادي يعني ). والطبيعي ان التفاعل مع الحياه كلها  بكياني كله  . اصل مينفعش اي حد في الدنيا يقسم نفسه حتت؟!! صعبه شويه . ولان كياني مرتبط ببعضه اكتر من ارتباطه باي شيء تاني ارتباط بديهي وفطري . فلو حولت اني اقسم كياني ده بدرجه اللي اخلي عقلي شغال في اتجاه وقلبي في اتجاه تاني هلاقي ان كياني مشتت ويسعي دايما الي الالتحام  للوصول لدرجه الكمال اللي اتخلق بيها .  المهم ان إعمال القلب والعقل في مسأله الارتباط مهم جدا علشان يكون فيه توازن في الحكم ع الشخصية وبالتالي فيه توازن في القرار النهائي. واعتقد ان عدم اعمال القلب والعقل هو من اهم الاسباب اللي بتخلي فيه محاولات فشل كتير في العلاقات الزوجيه بعض الجواز . لان الواحد بيتكل ع جانب واحد بس ويغفل الاخر . فتلاقي اللي قلبه اشتغل يقولك اللي بيحب حد بيحبه كله ع بعضه او ان اللي بيحب حد مش بيشوف عيوبه وهكذا…  بس ده مش صح وده ههبينه بعدين بالتفصيل. اما بقي اللي بيحب بعقله يقولك انا مدام عقلي مقتنع يبقي الحب ده شكليات او ممكن يقولك الحب بيجي بعد الجواز . يمكن يكون عنده بعض الحق في ان جزء من الحب هتكمل صورته بعد الجواز بس مش هتيجي من الباب للتاق كده. بيتهيقلي الحب ده عامل زي الجنين في بطن امه لازم يتغذي كويس علشان يكبر وتنمو كل اعضاءه  وده مش بيحصل بين يوم وليله ومحتاج رعايه واهتمام كبار اوي. الجنين ده  اصحابه ما صحيوش من النوم لقوه جه كان اساسه بذره علشان يبتدي يتكون ويكبر , يعني لازم يكون في ع الاقل  قبول بين الطرفين بجانب العقل.

لما قريت عن سيكلوجيه الحب في الموقع اياه اكتشفت اني مش الوحيده اللي مقتنعه انه الانسان بيحب لاسباب وبيكره برده لاسباب وان ممكن الواحد يبطل يحب  حد معين اذا اراد !!! وده اذا الواحد فهم نفسه كويس وعرف هو ليه انجذب للشخصية الفولانيه او العلانية.  محمد فاروق بيقول ان الواحد من وهو صغير بيرسم صورة في خياله عن مواصفات شريك الاحلام فيها كل السمات اللي يحب يشفها في الانسان اللي هيختاره ويعيش معاه بقيت حياته اذا قدرله ربك  الكريم ذلك.في ناس اولوياتها الشكل وناس تانيه اولوياتها الشخصية . وعلشان كده لما بنفقد اشخاص بنحبها بنميل دايما لمن يشابهم سواء في الشكل او في الصفات . وده مش لاننا مش عارفين ننساهم بس علشان  الصفات ده هي اللي بندور عليها في اي حد  من البدايه . لان ده صفات شريك الاحلام اللي كنت بحلم بيه من سنين. يعني لو كنت ما حبتش الشخصيه الفولانيه قبل ما اشوف بقيت الناس ده برده كان هيحصل انجذاب لنفس الشخصيات الا بقي لو مواصفات الفتي المنتظر ده اتغيرت !!!

طيب هي ليه في ناس كتير بتشتكي ان حبها بيموت بعد الجواز ؟!! طبعا مش كل الناس . لكل قاعدة شواذ. في ناس حبها بيكبر ويزيد بعد الجواز  زي ساره وعمر  كده مثلا – بالمناسبه ده روايه الكترونيه منشوره في جروب علي الفيس بوك ومن اجمل ما قريت بجد لانها مش بس مسلية بس لا وكمان فيها اخلاقيات عالية اوي –

http://www.facebook.com/group.php?gid=6635933057

نرجع لموضوعنا هو الحب والهيام بتاع العشاق اللي بيبقي قبل الجواز بيروح فين يا تري ؟ معقول كل الناس الكتيره اللي بتشتكي من موت الحب بعد الجواز ده بتعيش في كذبه بتخلقها لنفسها!!! او ان الحب فعلا بيموت!!! بس المعروف ان الحب الحقيقي لا يمكن يموت .اكتشفت ان فيه عوامل كتير اوي ممكن تخليني احس بمشاعر مزيفه تجاه حبيبي- اوممكن ميكنش حببي اصلا وانا بتوهم علشان الحاجات اللي جايه – او يعني بضاعف شعوري بالحب بالدرجه اللي مش موجوده في الحقيقة. يعني اولها انه يكون في الحبييب الحالي او الخطيب مواصفات من فتي الاحلام بس مش هو بالضبط . فيه كمان الضغوط الاجتماعيه – خاصا في المجتمعات الشرقيه –   صغير اوكبير كل ما يشوفك لازم يسألك هتتجوز امتي ولا متجوزتش ليه لحد ده الوقت ده الجواز ستره للبنت والولد و نص الدين ووجهه اجتماعيه وبناء اسره وسنه الحياه والذي منه من الحاجات الكتير اللي لازم تخليك تفط تنط من ع سريرك اول ما تصحي من النوم تدور ع عروسه والبنت توافق ع اول واحد يجلها ( بيقولوا الزن ع الودان امر من السحر) . واحيانا بتبقي المسأله حث ديني للواحد انه يتجوز لانه عفاف ولان الرسول الكريم صلي الله عليه وسلم  حث عليه لقوله

لا رهبانيه في الاسلام

النكاح سنتي فمن رغب عن سنتي فليس مني أي ليس على طريقتي

تناكحوا تناسلوا تكثروا فإني مباه بكم الأمم يوم القيامة

صدق رسول الله صلي الله عليه وسلم

وغيرها مما حث به  الدين ع الزواج

طبعا لا يغفل احدنا ع تذكر الضغط الاسري . يا ولاد عايزه افرح بيكم قبل ما اموت واشوف عيلكم بيطنططوا حوليا . طبيعي كل الاهل بتربي عيالها ومستنيه تشوف اللحظه ده بنتها او ابنها في الكوشه. كمان  فيه عنصر مهم – خصوصا في المجتمع الشرقي – ارضاء رغبه البني ادم واللي في مجتمعاتنا ملهاش غير طريق واحد . غير ان الواحد ممكن يلاقي ادامه حد كويس فيخاف ميلقيش زيه تاني – فرصة يعني حرام الواحد يضيعها من ايده الكويسين عمله نادره في الزمن ده والله وحده اعلم هو كويس ده بتتقال ع اي اساس يعني عنه فلوس فبقي كده كويس ولا مركز اجتماعي ولا خلافه من الحجات بتاع البوتيكات ده – سواء بقي كانت مواصفاته ده مناسبه ولا لا, ما هو مش كل كويس ينفعني!!! ( اصلح ممكن يجيلي واحد مثقف اوي وانا جهله اوي فالنتيجه انه عنصر التواصل والتكاافؤ بنا هيكون مقطوع فيبقي لا مناسب ولا يحزنون- العيشه هتبقي طول الوقت احباط وجنان). واحيانا المميزات  اللي في الطرف التاني بتعمي الواحد عن انه يشوف العيوب علشان الواحد يسهل المسائل يعني (مميزاته هتغطي ع عيوبه , مدقيش مفيش حد كامل وكفايه انه كذا وكذا وهكذا – الموضوع ده بيفكرني بناس كان لما تلاقي الاكل مالح تحط عليه سكر ع اساس انهم هيعدلوا بعض يعني – المشكلة الحقيقه ان فيه عيوب لا تعادلها مميزات والعكس). غير بها ان فتره الخطوبة الحياه بتبقي وردي اخر حاجه وكل واحد بيمشي بمبدأ اني لا اكذب ولكني اتجمل وبعد كده يتكشف المستور يا جميل !!! خد عنك بقي ان كل واحد بيحلم بانه في يوم يحب ويتحب ويحس باهتمام الطرف الاخر ليه اهتمام من نوع مخصوووووص . وكل واحد بيبقي عارف ده في التاني فتلاقيه بيحاول يشبع للاخر رغاباته فبالتالي يبقي مرغوب  ويظهر بصوره كويسه –  كل واحد بيضحك ع التاني من الاخر . ( يعني افتكر ان واحده صحبتي قالتها انه خطبها بعد كام يوم من الخطوبه قالها وحشتيني ولا بحبك مش عارفه وهم  مكنوش يعرفوا بعض قبل الخطوبه ولا شافوا بعض غير مرتين يمكن او حاجه كده!!!) المهم اني لو جمعت كل الحاجت ده مع بعض او اخترت بعضها  بس وحذفتها من قائمه الاحاسيس المرهفة هلاقي اني احساسي  تجاه اللي قدامي مش بالدرجه اللي انا مصرواها لنفسي ولا هي زي ما الناس شيفاها.  اجي بقي لبعد الجواز هلاقي ان  اغلب المسكات اتشالت وشوفت الصوره مجرده من التزين غير ان الضغوط خلصت والاجتماعيات  اكتملت واللي هيشبع اشبع حتي لهفتي في انه اخاف يضيع مني حببي او نسيب بعض او يخدوا حد مني قلت لاني ده الوقت فرصه بعدنا عن بعض بقت اضعف . نشوف بقي الصوره ذي ما كانت المفروض تكون  متشافه  وتبتدي تبرز العيوب اللي كان كل حاجه بتساعد ع كبتها واخفأها. ياتري الصورة هتبقي ازاي؟!!

للحب سر مازلت اجهله وكم سوايا بسر الحب قد حاروا

أليس في الليل للعباد اسرار حمر محاجرهم بيض مدامعهم وفي الشفاة تراتيل وأذكار
فلكل قلب اذا ما حب اسرار وكـــــــــل حب لغير الله ينهــــار

اكيد فيها حالات كتير هيبقي الوضع مختلف بمعني ان الحب الحقيقي هو المسيطر علي تقارب الشخصيات من بعضها.( واعني بالحب الحقيقي تحكيم القلب والعقل) وحكايه ان الناس بتعتقد ان الحب مات او اختفي بعد الجواز . ده يمكن يكون لان الحب بعد الجواز بيتحول لصوره تانيه غير اللي كانت ظهره  لينا قبله  بس اشتيقنا للاحاسيسنا في فتره الخطوبه ممكن يعمينا عن اننا نشوف الحب بشكله الجديد.

Read Full Post »